نش د الحراك – ⵏⴻⵛ ⴷ ⵍⵃⵉⵔⴰⴽ

Tags

, , , , , , , , , , ,

أزول خاوام, السلام عليكم,

هاد التدوينة فالحقيقة كان خاصني نكتبها شحال هادي. و لكن بزاف د الظروف خلاتني نتعطل و نخرًجها تال دابا. كانتمنا واخا هاكاك تكون باقا فالسياق و لي قراها يستافد منها, إما بمعلومات جداد و لا بشي نقاش لي نقدرو نبداو و نتمناو يكون بنًاء.

هاد التدوينة لي سميتها نش د الحراك (أنا و الحراك) ماغاديش نهضر فيها بزاف على الأحداث و لا على الأخبار. أولا حيث داكشي معروف بزاف و ثانيا حيث بغيت نعطي بعد شخصي, ماشي ندير تحليل سياسي. هو فالحقيقة كاين بزاف مايتقال من الناحية التحليلية, بحال مناقضة مفهوم دولة و انفصال و مؤسسات و دكاكين و أحزاب, و لكن راني بزًزت على راسي مانجبدهاش فهاد التدوينة, باش يكون فيها غي البعد لي بغيت. ديك المفاهيم كامة و نقاشات خرا أنحاول نرجع ليها فتدوينات اخرى إن شاء الله.

بالنسبة للي مامتعبش (و تانشك أي واحد تيقرا هادشي را أيكون متبًع), الحراك الشعبي فالريف هو واحد السلسلة د المظاهرات, وقفات و مسيرات لي بداو فاللخر د أكتوبر 2016 من بعد ما تقتل واحد الشاب سميتو محسن فكري فالحسيمة. هاد الشاب تطحن ف كاميو د الزبل حيث شي واح عطا أمر يطحنو من بعد ما دخل للكاميو يحتج على أنه رماوليه الحوت كامل لي كان ايبيع فالزبل. المهم هنايا بدا الحراك ديك النهار نيت و كانت وقفة, فيها ناصر الزفزافي و عامل إقليم الحسيمة و وكيل الملك, و بقاو تيهضرو الليل كامل بحال لي عارفين فهاد الفيديو:

نهار من بعد, كانت وقفة فالحسيمة, و هاديك هي أول مرة سمعت فيها بالزفزافي:

فهاديك الوقفة, تأسسات اللجنة د الناس لي حضرو, و كانت سميتها اللجنة لمتابعة التحقيق في ملف الشهيد محسن فكري. هاديك كانت أول نواة ديال الحراك. اللجنة فاللول كانت تاتجمع فالحسيمة و تادير لايفات فيسبوك. بزاف د اصحابي كانو فاللجنة,  و بزاف منهم معتقل دابا مع الحراك. أول مطالب د اللجنة كانت هي هادي:

ديك الساعة, كانت قضية محسن فكري هي المهممة فوسائل التواصل الإجتماعي و هضر عليها المغرب كلو. بالموازاة مع داكشي, كانت اللجنة تادير اجتماع مورا اجتماع و تطورات. من تما ولات منظمة اكثر و تطوًرات و حتى المطالب ديالها تقادًات اكثر و ولات شاملة. اللائحة د المطالب النهائية تقررات نهار 5 مارس 2017 و تعرضات على الجماهير الشعبية فوقفة فالحسيمة و اتافقو عليها. لي بغا يشوف لائحة المطالب د الحراك كاملة را كاينة فويكيبديا, فهاد الرابط. ما حدًي تانهضر على المطالب, واحد القضية مهم لاحظتها هاد الأيام. ملي الدكاكين السياسية (الأحزاب) تيهضرو دابا على المطالب, بحال إلا تيقولو غي الإقتصادية و الإجتماعية, را كاين تا مطالب قانونية و حاضرة من النهار الأول, بحال الكشف عن مصير 5 د الشبان لي تقتلو ف 2011, و شفت بحال لا الأحزاب و لا المؤسسات الرسمية تيحاولو يديرولها عامرة فخاوية باش تًنسى.

لي وقع من أواسط نونبر تال أبريل هو بلًي اللجنة و الحراك تطورو و ولاًو تيديرو مظاهرات كبار مرة فالأسبوع وحتى أكثر. كانو بزاف د الأشكال د المظاهرات بحال المظاهرة ديال قرع الطناجر و مظاهرة الأكفان. المهم ماشي هادشي لي بغيت نقوول. لي بغيت نقول هو فهاد الوقيتة كلها بداو الناس فالمناطق الخرا د المغرب تينساو الحراك و ماتبعوهش بزاف. غادي يعاودو يتبعوه تا أيولي الزفزافي مشهور  مع اللايفات فيسبوك لي كان تيدير. فهاداك الوقت لي ماكانوش الناس متبعين, هو لي وقعو بزاف د الحوايج. أنا كنت متبع. فديك الوقيتة كان مشكل فالقياة د الحراك حيث بزاف كان تيجيهم بلي الزفزافي ماتيناقش ديما و شي مرات تيدير قرارات فردية. فواحد الوقت كان تا دينامو الحراك نبيل أحمجيق تناقش مع ناصر و ماتفاهموش فهاد القضية. هادشي هو الوقل فاش كان أيضا الخروج د المرتضى إعمراشا من اللجنة. مبعد المرتضى غادي يتطرف فاللإنتقادات و يولي تيدخل فالحياة الشخصية. ماعلينا, المهم ديك الساعة كانت الوقت هانية و الإختلاف رحمة. تانا كنت انتاقدت شي حوايج دارها الزفزافي, واخا طبعا كنت مع الحراك.

ديك الساعة كيما قلت كانت الأمور هانية و ماكان احد محبوس. هادوك الإنتقاد كنت كتبتو فإطار واحد السلسلة د التغريدات لي كتبت على الحراك مع كنت عاد جيت من المغرب و راسي تيدندن غي لا للعسكرة. و كيما قلت, ديك الساعة أغلب الناس (فالمناطق الأخرى) ماكانش عندها غرض بالحراك و كاين لي ماعارف عليه والو (و أيجي يفهم علينا مبعد). السلسلة د التغريدات كانت هي هادي:

فديك الوقت, كنت عايشت و تبعت الحراك الشعبي ل6 أشهر. الشهر السابع كان أيكون هو الغريب علاش؟ حيث فهاداك الشهر بحال لي قلت, غادي يتشهر الزفزافي بزاف باللايفات, و غايبداو يبانو الفهايمية و العياشة و محللي آخر ساعة. هاد الشهرة لي دارت مبعد بالحراك فنظري هي لي خلات الناس تمشي للحبس. أول واحد تانلومو هو وسائل الإعلام, لي فنظري كانو تيحاولو يلقاو السكوبًات بزًز, و بزاف د المرات خلقو مشاكل لعدد د الناس. مثلا واحد المرأة سميتها نوال بنعيسى كلشي بدا تيوصفها باللي راها قائدة الحراك مورا الزفزافي. و داكشي تيقولوه من إديولوجيا نسوية (خاصة الجرائد الفرانكوفونية). و هي براسها تبرأت من داكشي, و خلقواها غي المشاكل مع البوليس لي استدعاوها فإطار أنها القائدة الجديدة.

بحال لي قلت, ما بغيتش نهضر بزاف على الحراك من الناحية د المستجدات و الأخبار و التحليلات و الأراء, حيث هاديك كاينة بزاف, و كاين ناس أحسن مني لي يقدرو يحلًلو و يشخصو مع أخد التاريخ و معطيات أخرى بعين الإعتبار.أنا بغيت غي نعطي نبذة شخصية على كيفاش عشت مع الحراك لي وصل دابا لتقريبا 8 أشهر. يمكنلك تتخيل شي واحد عايش هادشي هاد المدة كاملة. و يفيق نهار يلقى اصحابو و ناس لي شارك معاهم بزاف د الحوايج تعتاقلو ما بين ليلة و ضحاها, و كاين لي تخطف و لي تعذب. أشنو غادي تقول ملي تشوف شارع ماتيخليوكش تدخلًو إلا بالبطاقة الوطنية؟ و لا ملي تشوف هاد البراعم فالحبس بشي تهم لي يمكن أصلا ما تيفهموهاش؟

كنت قلت واحد الوقت بلي يمكن كان عندي اختلاف مع شي واحد فالحراك. هادشي ماتيعنيش باللي راه ماتاتافقش مع مطالب, و إنما غي   ملاحظات فالتدبير, لي تقدر تكون ملاحظة فالحياة اليومية ما بين أفراد الأسرة الواحدة, و ماتاتعنيش باللي باقين مامتافقينش تال دابا. بحال لي قلت, أنك تنتاقد فوقت فيه الأمور هانية بغرض التقويم ماشي هو تنتاقد واحد و هو فوضع ضعف و باغي تتشفى فيه. بالعكس دابا فنظري آخر حاجة خاص نشوفو هي الإختلافات. خاص نكونو مجموعين ضد الفساد والإستبداد. الحاجة الوحيدة لي مهمة دابا عندي هي كًاع هاد الناس يخرجو من الحبس حيث مظلومين و ماعندهم تا علاقة مع التهم لي ملصقينها ليهم. آش جاب  المرتضى إعمراشا للإرهاب؟ واش 2700 درهم تمويل خارجي تيهدد استقرار شي دولة؟

اللهم إن هذا منكر واها

وأخيرا و ليس آخرا, راه خاص إطلاق سراح المعتقلين, هادي راه ضرورية و خاص تكون اليوما قبل غذا. آخر لائحة د المعتقلين عندي كانت نهار21 يونيو 2017.

DCzgIEEV0AA3Iv1

المشكل كل نهار تيزيدو يعتاقلوما بين 5 تال 6 د الناس. مورا هادشي عاد خاص تتحقق كًاع المطالب لاخرا.

هذا ماكان, و أثقداوم إ مارا

 

أشناهي الراية و أشناهو مفهوم الدولة

هاد الأيامات شفت واحد القربالة نايضة فمواقع التواصل الاجتماعي من بعد المظاهرات لي كانوا فالحسيمة على محسن فكري, و السبب دهاد القربالة هو شي رايات لي كانت تما, إما د جمهورية الريف ولا الرايات الأمازيغية الملونة.

ديما تانناقش هاد القضية, ولكن هاد المرة قلت نكتب تدوينة فنوبة باش نتهنا و إذا احتجت نناقشها نسيفط رابط التدوينة باش تكون الفكرة و المنطلق ديالي مفهومين.

أولا و قبل كل شيئ و باش نكونو واضحين و مفاهين, خاصني نكتب التعريف ديال جوج مفاهيم أساسيين لهاد النقاش, ولي بزاف د الناس ماتيعرًفوهومشي بدقة. را غي من التعريف أنقدروا نحلو طرف كبير من المشكلة و نتفاهموا أكثر. الجوج مفاهيم لي باغي نعرًف هوما أشناهي دولة , و أشناهي راية؟

الدولة هي بزاف د الحوايج لي تقدر تكون عندهم بزاف د الدلالات, و فالوقت الحالي الناس تاتعرًف الدولة بديك البقعة الجغرافية لي تاتسكن فيها و تعطيك باسبور و معتارفا بيها الأمم المتحدة إلخ. المشكلة, الدولة راها كلمة لي تاتقبل بزاف د التعاريف و التأويلات على حساب معامن تاتهضر و شنو الزاوية لي تيشوف منها. مثلا الناس د العلوم السياسية أيقولك الدولة هي تجمع لي عندو أربعة د المقومات لي هي الأرض و الشعب و الحكومة و إعتراف من دول آخرا.

ولكن هادشي تيدير تاهو نقاشات جانبية, بحال دابا بوليزاريو واش بلاد؟ حيث فيها ديك المقومات؟ و لا أبخازيا ولا كاطالونيا؟

كيما شفنا هذا را غي تعريف واحد د الدولة, كاين بزاف د الطرق آخرا باش نعرًفوا دولة عاود, بحال دابا من التاريخ, و أبرز مثال هو المغرب الكبير مثلا لي فيه موريتانيا و تمبكتو, ولا دولة الإسلام لي باغين داعش و تيجمعو فيها كًاع المسلمين. المهم الفكرة لي بغيت نعطي هي باللي هاد القضية ديال دولة ولا حدود  را غي اعتباطية و حددوها سياسيين ولا مستعمرين فواحد الوقت جابو قلم و مسطرة. حيث بحال دابا علاش تلمسان فالجزائر و وجدة فالمغرب؟ علاش هوما ماشي فنفس البلاد واخا مشاركين فكلشي؟ الناس د مغنية راهم أقرب ثقافيا للناس د وجدة 100 مرة أكثر من قرب الناس د الدار البيضا لناس وجدة. و لكن نواقص التعريف السياسي د دولة تيخلي أنه تيتفرض على ناس وجدة يكونو أقرب لناس الدار البيضا حيث بجوج عناصر من دولة المغرب (د مورا 1956) و بجوج خاص يتحاربو مع ناس مغنية إلا وقعات حرب مع الجزائر الله يحفظ. هادشي علاش بحال دابا تانصيبو بزاف د السلفيين ما تيقبلوش مبدأ الدولة و تيقولك كًاع المسلمين أمة (دولة فالإسلام هي أمة) وحدة, و تيصومو رمضان مع السعودية, و لهاد السبب عاود تانجبرو المناضليين د اليسار المتطرف فالغرب تيطالبو ماتكونش حدود فالعالم حيث هادشي غي إعتباطي جا و قرر وشي بنادم فواحد الوقت و صافي. هذا بلا مناندخل فنقاش د أنه أصلا الدول ديالنا متخًلفة و تيسدًو الحدود بيناتهم, و الإعلام فكل دولة يزيد يشحن الشعب و يعطيه فكرة غالطة أنه أحسن من الأخرين و الأخرين خايبين إلخ.

بحال لي قلنا, ملي تيكون شي واحد عضو فشي دولة (بلا ما يختار, حيث تولد فيها), تيتشارك مع الاعضاء لاخرين بزاف د الحوايج, إما حيث هوما من منطقتو, ولا حيث الدولة تاتركبهوم فيه (مثلا من خلال المدرسة, الإعلام إلخ). من بين هاد الحوايج كاين الراية. الراية د شي دولة هي واحد الثوب فيه رموز, كل دولة و الرموز ديالها, المهم تيكون الهدف منها زعما هو بلي ديك الرموز لي فالثوب هي لي كاتمثل واحد الحاجة لي كيفتاخرو بيها كًاع الناس و العناصر لي مكونة ديك الدولة. و بحال دابا إلا مشا عنصر من ديك الدولة لجيهة أخرا فالعالم و هز ديك الراية را زعما خاص تكون فخر ليلو و الناس لي من بلادو تاهوما يفرحو. شحال هادي, كانو الرايات تيتخدًموا بزاف فالحروب, كل طرف تيهز راية و أراك للفراجة. فالوقت الحالي نقدرو نقولو باللي راها رمز, لا كانت الحرب راها فيه, و لا كاس العالم و لا أي حاجة.

فإطار هاد التدوينة ماغاديش ناخد المثال د المغرب و باللي أصلا الراية ديالو فيها إشكال حيث دايرها ليوطي, و عليها تيتحفظو عليها شي وحدين, غادي نفرض لدواعي النقاش أنها مقبولة من عند كلشي باش نكمل فالتحليل ديالي.

دابا كل بلاد عندها راية, آه و من بعد؟ الراية را ماشي ضروري تكون ديال بلاد, تقدر تكون أي حاجة  كيبغي الواحد يبين راسو أنه كينتامي ليها من الناحية الهوياتية. و هنا كاين المشكل, حيث عند بزاف د الناس الهوية = الوطن/الدولة. و هذا غلط كبير حيث عاد بيًنت باللي أصلا عدد من الناس مامسوقينش لمفهوم الدولة بتعريفه الحالي, و كاين ناس خرين تيعتابرو الهوية ديالهم خليط ماشي ضروري غي الدولة لي تاتمثلو, أنعطي أمثلة. فبزاف د الدول مثلا, كاين رايات لكل منطقة, و لكل مدينة. بحال دابا برلين عندها راية ديالها, و إلا هز شاب راية هرتا برلين فماتش مع دورتموند, را ماتيعنيش أنه ماتيحملش ألمانيا ولا باغي الفتنة و الإنفصال, و إنما فرحان بمدينتو لي تينتامي ليها. نفس الحاجة لا هز واحد راية الإسلام, را ماتيعنيش هو ماشي مغربي ولا جزائري, و إنما تيعني بيها أنه تينتمي لأمة الإسلام و هكذا دواليك.

فهاد السياق كاين فشمال إفريقيا أنواع آخرا د الرايات من غير الرايات د الدول اللي تانعرفو. مثلا كاينة الراية الأمازيغية. هي واحد الراية لي تصنعات حديثا, و تاتعبر على الإنتماء للغة أو المكون الأمازيغي من خلال الرمز “زي” لي فيها فالوسط. ملي شي واحد تيهزًها, را زعما تيفتاخر بالأمازيغية و نقطة. ماتيعنيش باغي ينفاصل ولا باغي دولة أخرى ولا ماعرفت شنو, بل تيعني أنه تيعرًف راسو كأمازيغي شمال إفريقي هوياتيا, كيما يقدر يعرًف راسو أنه إفريقي ولا أنه بنادم كًاع و صافي. ما يمكنش تتحكم فالهوية د بنادم و تقولو هز هاد الراية فالمظاهرات بزز منك, لبزاف من الإعتبارات أولها أنه مايمكنش نبززًوا على تاواحد شنو الهوية لي تيعرًف بيها راسو, هذا را من المبادئ اللولا د الحرية. نفس الحاجة بالنسبة للراية د الريف. من التجربة الشخصية ديالي نقدر نقول أن الأغلبية لي تيهزوها تيكون حيث تيبغيو المنطقة ديالهم و فخورين بيها, و ماكاينش تناقض مابين تبغي منطقتك (أكثر من بلادك) و تبغي بلادك تاهي. ديك الراية عندها تاريخ و رمزية كبيرة عند ديك الناس من وقت محاربة الإستعمار, ويلا كانت تاتفوج عليهم يخرجوها باش يرتاحو و يحسوا براسهم أحرار ماكيبانليش المشكل. المهم هو أنهم تيديروا مسيرات سلمية, و الأفكار كاتناقش بالأفكار.

علاش أصلا لا مشيتي فمظاهرة فالرباط خاص تهز راية المغرب؟ كاين لي أيقولك هادي مظاهرة أساتذة إذن أنهز راية الأساتذة, و هذا هو, آش دخل راية دولة فمظاهرة أساتذة؟ كاين لي أيقولك أسيدي أنا بنادم, علاش أتحصرني فبلاد, نهر الراية الإشتراكية ولا علم الأمم المتحدة.. المهم الفكرة أن هاديك قضية هوية, و مايمكنش نفرضو على الناس هويتهم تكون هي الوطن أولا. را كاين لي تيعرف راسو أولا بالدين ديالو, و لا باللغة ديالو, و لا منطقتو, ولا إيديولوجيتو, و هاديك حريتو, و الإختلاف نعمة. نتمنا تكون الفكرة ديالي وصلات و تانميرت إ مارًا .

التطور ديال جريدة هسبريس ف 7 سنين من 2007 ل 2014

بحال بزاف دالناس, لاحظت مع الوقت باللي كاين شحال من موقع لي بدل الخط التحريري ديالو و بزاف د الناس لي قلبو وجههم و قلبو الفيستة على حساب الريح, فهاد الإطار, و باش ماشي غي نتسماو كانقولو الشفوي, عملت واحد الدراسة ستيوتة العام لاخر على أكبر موقع إخباري مغربي إلكتروني, لي هو هسبريس, و كيفاش تبدل من 2007 ل 2014, و كيفاش أيقدر يولي مبعد؟

hespress

المهم النتائج أتصيبوها فهاد البي دي إف التحت, قراية ممتعة و مبروك العواشر

Download “Hespress Analysis – Anass”

اللسانيات د الدارجة بالدارجة (الحلقة اللولا) – شي شوية د الكلمات لي عنا فالدارجة لي أصلهم أمازيغي

السلام عليكم,

شحال هادي, ف 2012 (آيه مع دابا الوقت و الزمان وهذا را نسبي و 3 سنين كاتبان بعيدة) كانت نبشاتني واحد التغريدة د صاحبي  فالتويتر @moriscbandoler

ليكان كتب فيها باللي العدد د الكلمات الأمازيغية فالدارجة قليل بزاف على حساب واحد المصدر كان عطاه فديك التغريدة

والو شحال تناقشنا فالتويتر و فويكيبيديا و تلاقينا كًاع فالسبليون و داك القضية بقات لاصقالي فمخي قلت والو خاص نفحمو بشي لائحة صنع اليد, فيها بعدا غي كثر من 37 راهادشي ماشي معقول و واعدتو نجيبلو على الأقل 100 كلمة بالدارجة كانعرفها أصلها أمازيغي

المهم را الدارجة و عكس لي كايصحاب لبزاف, را ماشي غي عربية , و إنما مخلطة مابين جوج د الهضاري لي هوما العربية والأمازيغية, و لكن علاوداش بزاف كايعرفو غي العربية, كايشوفو غي من الزاوية ديالهم و كايعطيو خلاصات, و را كنت قلتها هنايا.

Penon Alhucemas

المهم للتلخيص الساهل ماهل را الدارجة هي دابا ملي الأمازيغ بداو كايتعلمو العربية خداو التراكيب ديالهم لي هي أمازيغية و خضًروها بكلمات عربية, بحال لا قلتي كايهضرو الأفكار الأمازيغية بكلمات عربية, عليها العرب لاخرين كادجيهم صعيبة يفهمونا, و مرة آخرا كانعاودها, لي ماكايعرفشي الأمازيغية صعيب باش يتافق علاوداش كايشو التأثير غي من جيهت اللغة لي كايعرف, وعليها كانصح الواحد يتعلم شويا د الأمازيغية باش يكون عندو شويا د راس الخيط و يقدر بناقش معانا. على ماحال, هاد الموضوع مع طوبل و معقد أنهضر علبه فيزاف د التدوينات, كثيشي المسألة د التراكيب و اللغة, دابا هاد التدوينة أنهضر فيها غي على المعجم لا بغا سيدي ربي.

maroc amzigh

هادي واحد اللائحة وجدتها هادي شي سويعات د شي كلمات كانخدموهم فهضرتنا د ساير الأيام د الدارجة و كلها كاينة فالأمازيغية,شي منزًل هو هو, وشي مخالف غي شوية, و أنعمل حداه الكلمة بالعربية الفصحى, حيث كاين معلوم شي كلمات كاينة غي فالدارجة د شي مناطق و يمكن فجهة آخرا كًاعما يفهموهم, الفصحى كلشي كايفهمها, يا الله ها باسم الله.

مثال الكلمة بالفصحى ولا مرادف آخر بالدارجة الكلمة الأمازيغية الكلمة بالدارجة النمرة
سوق الدلالة مزاد علني تادلالت الدلالة 1
صافط برية بعث/أرسل صيفط صافط 1
المحجوبي أحرضان (واخا أبيض) صاحب بشرة قاتمة أحرطان الحرطاني 2
الترفاس د المعمورة غالي الكمأ ترفاس ترفاس 2
الحب ساروت د القلب المفتاح تاساروت ساروت 3
الغلال بنين حلزون أغلال غلالة 4
طاجين البركة بالعسل البطة أبريك البركة 5
عصير بوعويد الإجاص بوعويد بوعويد 6
—– ضرب/اصطدم إزْدْحْ زْدْحْ 6
المش كيقمش قطة أموش مشً 7
ثاثا ماعندها ملة الحرباء ثاثا ثاثا 8
التبروري فلًق بوتفليقة البرَد أتبرور التبروري 9
فرطوطو يشار الخير فراشة الليل أفرطوطو فرطوطو 10
موكة كاتعيش فالليل البومة تالموكت موكا 11
توحشت الما د الخابية وعاء ماء أخابي خابية 12
يلزت واحد مولاي البلزة قال كلام غير موزون ثبلز بلز 12
زرمومية كاتعيش بلا زنطيط سحلية أزرمومي زرمومية 13
نيني يا مومو نم (للأطفال ) نينًي نينًي 14
فرماش كايضحك بدون أسنان أفرماش فرماش 15
مومو عيني بؤبؤ مومًو مومًو 16
رزوزية كاتقرص بالجهد دبًور أرزوزي رزوزية 17
—– الضفدع أكًرو الجرانة 18
سلًم على لوستك أخ الزوج اللًوس اللًوس 19
سد الشرجم نافذة آس ارزم الشًرجم 20
فتح الطاقة النافذة طاقا الطاقة 21
لي تلف يشبر الأرض أمسك (بقوة) إشبّر شبّر 21
تقهرت بتامًارا العمل الشاق تامارا تامًارا/الدًمير 22
صوبًا د خيزًو الجزر خيزًو خيزًو 23
طاجين بوزروكً البلح بوزروكً بوزروكً 24
—– —- بغرير بغرير 25
—– —– طاجين طاجين 26
—– —– أملو أملو 27
—– —– سلًو-السفوف -الزميتة سلًو-السفوف-الزميتة 28
عصير د اللتشين برتقال لتشين لتشين 29
—– طماطم ماطيشة ماطيشة 30
—– حاضر / مهما واخًا واخًا 31
—– رسالة تابرات بريًة 32
هاك وارا هات/اعطيني آرا آرا 32
—– لا شيئ والو والو 33
ماشي باسل د الفصحى زعما شجاع مزعج/ثقيل أوبسيل باسل 33
—– تين كرموص كرموص 34
السبالة كاتقطًر الصنبور السبًالة السبًالة 35
ولاّ بشلاغمو الشنب/الشفتان الشلاغم الشلاغم 36
—– سجاد من فراء الخروف تاهيضورت هيضورة 37
غوفلتي شعر كثيف غوفالة غوفالة 38
شعرو اكرد بحال الجيكس شعر مشعث أكرد أكرد 39
—– خنزير بري حلوف حلوف 40
—– جوز كّركّاع كّركّاع 41
تبزكّيلة هادي! كلام/فعل غير موزون أبزكّال بزكّال 41
شو الفليليس الصوص أفولوس فلوس 42
—– شعر مبعثر أشعكوك شعكوكة 43
ضربة البزيم الحديدة في الحزام البزيم البزيم 44
—– الحلاق أحجّام الحجام 45
—– لأن أشكو أشكو (في مراكش) 45
—– حارس أعسّاس عسّاس 46
بودربالة ثوب مرقًع أدربال دربالة 46
وا الحضية الحضية يراقب يحضي كيحضي 47
—– سيدتي لالاّ لالاّ 48
وا بهل هذا ! أحمق أبوهالي/أبوهاري أبهل/بوهالي 49
عنداك الفكّيع المسموم الفطر فكّيع فكّيع 50
—– هريس الفول أو جلبانة أبيصار البيصارة 50
—– البرد القارس الصميقلي الصميقلي 51
—– اللص أشفّار شفّار 52
تيدردكّ فنصاصات الليل يصدر صوت مزعج أدردكّ دردكّ 53
—– الخصيتان إيقلالن القلاوي 54
—– الشفة أشلقوم الشلاقم/القنانف 55
هز البوط السّرة ثابوط البوط 56
—– أغلق بلّع بلّع 57
آتاي مسّوس ناقص سكر مسّوس مسًوس 58
—– قبعة من القصب تارازال تارازا 58
فلوس اللبن قرد الأطلس زعطوط زعطوط 59
—– القمل البق البق 60
بزيزا صدًعاتني فالليل صرًار الليل أيزازا بزيزا 60
بوبريص خا الوزغة سحلية بوبريص بوبريص 61
—– حشرة أبخوش بخوشة 62
يخّ طفو كلمة للتعبير عن السخط يخّان يخّ 63
—– محل تجاري تاحانوت حانوت 64
قصة بوفسّيو و السبع طائر الوصع بوفسّيوْ بوفسّيوْ 64
—– أصدر صوتا بعد الأكل/تجشأ إتكّرّع تكّرع 65
—– —– مقريج مقريج 66
آتسند آيا جحموم طائر الشحرور أجحموم جحموم 66
—– —– قندورة/فرجية/قشابة قندورة/فرجية/قشابة 67
—– وجه أخنشوش خنشوش 68
—– ندى الجبل (نبتة) أزير أزير 69
شنو زارع فالبحيرة؟ بستان تابحيرت بحيرة 70
—– سمين أهبّاز مهبّز/مطبّز 71
—– سلحفاة أفكر فكرون 72
كمّارة الويل وجه بشع أكمّار كمّارة 73
التبوريشة اقشعرّ تبورش تبورش 73
—– كسكس كسكسو كسكسو 74
—– أبكم أزيزون زيزون 75
عطيه يجغم را جاف اختنق من العنق جيّف جيّف 76
شرّكّ كّطّعّ مزّق شرّكّ شرّكّ 76
—– السماد العضوي أغبار لغبار 77
برهوش و ضاصر غير مهذب أبرهوش برهوش 77
ولول يا لميما —- إيلولاون الزغاريد/التولويل 78
—– متملًق أياحلاس بحلاس 78
ألف تخميمة افكّر خمّم خمّم 79
اعفط آ معلم داس على اعفس عفس/زظم 80
خزاعيات (مظاظر) انظر خزار خزر 81
سلمية سلمية سكين جنوي جنوي 82
—– أليس كذلك ياك ياك 83
—– الخارج برٌا برٌا 84
مالك كاتبرّح؟ يصرخ في العموم أبرّاح برّاح 85
كسكسو بالتفاية قطع اللحم مشتقة من تيفييي التفاية 85
لا دجاج لا بيبي ديك رومي بيبي بيبي 86
—– صدف البحر بوجغلال بوجغلال 87
قصّرت فيفا يسهر في الليل قصّر قصّر 88
—– أصلح سكّم سكّم 89
—– ورقة كاغيط كاغيط 90
—– تعرض للفحة شمس أزناكّ مزنّكّ 91
صقل إيوا ! اسكت صقل صقل 92
ماحنا غير عزارا شاب أعزري عزري 93
—– اعتنى اتنهلا تهلاّ 93
—– —- بلغة بلغة 94
—– تعافى يبرا برا 95
—– وعاء كبير للطبخ تابرمت برمة 96
—– اجلس (للأطفال) تيتّي تيتّي 96
باداد يتلّف الحب أباضاض باضاض 97
المياهات كاتشرشر شلال أشرشار شرشار 98
شرويطة، مْشْرْوْطْ مزّق الثوب شْرْوْطْ شْرْوْطْ 98
رويضة مفشوشة أفرغ من الهواء فشّ فشّ 99
فششوه واليديه دلّل الطفل إسفشش فْشّْشْ 99
العيد الكبير الكير/منفاخ رابوز رابوز 100
—– وجد يوفا=إجبر جْبْرْ 100

المهم هذا غي شي شويش من لي يقدر يكون, ومع كل مرة كاناقش هاد القضية بزاف ماكايتيقوشاي قلت هاهي هاد اللائحة موجودة نعملها المرة الماجة غي قطع لصق فماحل مانكتب زابور داوود كل نوية كاناقشو هاد القضية ,و اللي بغا يخدًمها ولا يزيد فيها مرحبا بيه, منتوج مفتوح هذا

أتاي سيدي بنعاشر

,سلام نربي خاوام

أبحاث خاطفة حول جمهورية سلا و بدايات الإسلام في أمريكا

اليوما كنت كانعمل واحد البحث خفيف على أول رئيس د جمهورية سلا الهولندي اللي اسلم و تلا اسمو مراد الرايس.

Murat Reis

Jan Janszoon Van Salee

و ملّي فتشت شويا فولادو صبت 2 منهم مشاو عاشو و سكنوا فأمريكا و تسمّاو أنطوني و أبراهام

Antony and Abraham Van Salee

 Anthony “The Turk” Janszoon van Salee , son of the president of the Republic of Salé in Morocco, was among the earliest and richest settlers of Manhattan island, a devout Muslim, and the ancestor of Cornelius Vanderbilt, the Whitneys, Humphrey Bogart, and, according to family lore, Jacqueline Bouvier.

خلاق واحد فقرطاخنة (اسبانيا )لاخر ماعرفتشي فاين ولايني كبرو بجوج فسلا و كانو مسلمين بحال باباهم (هاد التفصيل مهم فالكمالة د القصة..)

هي التسمية القديمة د سلا قبل مادجي فرنسا Salee هي”من”و Van :را هي السلاوي بالهولندية Van Salee

Salé و تسمًيها

ماعلينا هاد الجوج كانت عائلتهم غنية و بيدمان كان باباهم هو الزعيم ديال جمهورية بورقراق مشاو لأميريكا ف1633 و كانو من اللوالا لي سكنو ف نيويورك لي داك الساعات كان سمها نيو أمستردام. غالبا مشاو ليها حيث أسسوها الهولنديين و هاد الجوج عزارا كانوا كايعرفو الهولندية حيث هي لغة باباهم (يمّاهم سلاوية).
المهم هاد العائلة د فان سالي معروفة بزاف فنيويورك و مشهورة و من الناس حفايدها كاينة بحال داباجاكلين كينيدي مرات الرئيس القديم د أمريكا.

دابا السؤال ديالي ,ولا الصراحة الأسئلة ديالي هي واش العائلة د فان سالي هوما أول مسلمين سكنو فأميريكا؟ و علاش حفايدهم ما بقاوشي مسلمين؟
ماكانهضرشي على المسلمين اللي مشاو لأميريكا قبل كولومبوس و رجعو بحال الأندلسيين لي هضر عليهم الإدريسي ولا القراصنة دسلا لي مشاو لكندا و بالتيمور ولا الكارايبي حيث هادوك كلهم رجعو لسلا مبعد

المهم السؤال المهم لي عندي دابا هو واش أول مسلمين “أحرار” سكنوا فأميريكا كانو من سلا؟ حيث هاد الجوج ماهضروشي عليهم بزاف والمصادر كايقوليك أول المسلمين هوما العبيد لي جاو ف 1800 (ولا حتى قبل بحال الزموري مفخرة التويتوما) بيدمان هادو جاو 200 عام قبل، واش اهمال ولا حيث مامعروفينشاي فنوبة؟

Republique Salé

الراية د الجمهورية د سلا لي كان أول رئيس ديالها هو مراد الرايس. الجمهورية د سلا هي آخر لي حكم المنطقة قبل من العلويين

ها شي شوية د المعلومات لي جبرت عليهم عملتها فهاد الثلاثة د الروابط التحت، ، لي عارف كثر افيدنا باش “نفضو الغبار”، يقدر إكون هذا شي خبار جديد

1- Antony Jansen Van Salee

2-  آنطوني فان سالي

3- Right-Wingers Would Be Shocked to Learn That Islam Has Been Part of American History Since Its Founding

4- جمهورية سلا و وزارة الأوقاف الإسلامية

أجييو نعرفو شي مغنيًين مغاربة فالخارج

شحال هادي, ف 2012 ملًي كنت عاد حلًيت واحد الحساب فتوبتر كنت خرًجت واحد الهاشطاغ على شوية د المغنيين لي أصلهم   مغربي و لكن تقريبا كًاعما معروفين فالمغرب و معروفين بزاف فالبلدان لي ساكنين فيها, الهاشطاغ كان هو  #MorSingAbroad و تيظهرلي باقي البحث خدام فيه.

المهم قتارحو عليها شي مغردين (تاهي شحال هادي) باش نجمع داكشي كامل فتدوينة باش مايتلفشي, و هادشي لي كاندير دابا.

 ماشيكلهم مزيانين و لا نجوم و لكن مافيها باس نعرفوهوم, و معلوم حاولت نختار هادوك لي ماشي معروفين وبعاد شويا على البلدان لي أصلا كانعرفو فيها بزاف د المغاربة بجال فرانسا.

باسم الله نبداو بجيرانا اسبانيا و المغني هذا معروف بزاف عندهم سميتو حكيم. خلاق فالدار البيضا ف 1966 و كبر فيها و سكن فاسبانيا ف 1987 و من ديك الساعة و هو ساكن فمالاكًا.

فوق اسبانيا كاينة فرنسا فيها زهرة هندي كاتغني بالأمازيغية و الإنكَليزية و, دابا تعرفات شويا اكثر فالمغرب من بعد المهراجانات لي شاركات فيها. تخاصمت معاها ملًي مشات لمهرجان فاسرائيل هاهي فبالكم

فإيطاليا كاينا مليكة أيان المولودة فميلانو, باباها مغربي

شويا أكثر شمالا فبلجيكا كاين النجم الدوزي و كذلك الريفي الغير المعروف خالد إزري لي خلاق فمليلية و عايش من شحال هادي ف بلجيكا

في ألمانيا كاين رابًور مغربي فريد من نوعه كيغني بثلاث لغات,الأمازيغية الألمانية و الإنكَليزية,بنعيسي

 فألمانيا كذلك كاينا سناء كَمور من مجموعة “مونروز” ما معروفاشاي فمرًة فالمغرب

مازال فدوتشلاند, نادية بنعيسى معروفة عندهم خاصة بالفضيحة ديالها مع السيدا

آخر واحد من ألمانيا هو مراد كيل من فرانكفورت, خاسر بحال كًاع الرابورات

دابا وصلنا لهولندا و فيها بزاف, أوَلهم بارا موكرو المراكشي اللي كان 4 سنين دلحبس من 2007 ل2011

Ali B هو أشهر رابور في هولندا على الإطلاق, من طنجة

 الخاسر ديال هولندا مغربي و سمييتو شاك (الإسم الحقيقي الشافعي لابقيت عاقل)

ولد حبيب علي بي اسمو ياسر و مشهور بالأغاني الرومانسية ديالو, نصو مغربي, نصو مصري و خالق فهولاندا

مجموعة معروفة فهولندا عندها أغاني بالأمازيغية و الهولندية Rap N B Flavor

 Wu-Tang Clan (تاهو مغربي من هولندا سميتو طارق أزوكًاغ (الأحمر Cilvaringz

جاستين بيبر ديال هولندا مغربي حتا هو و اسميتو منصف

آخر وحدين من هولندا هما الأخوان فورادي

 Sugababesإلا قطعنا بحر الشمال فانكَلترا أنجبرو أمال بنرابح من مجموعة

 Outlandishنطلعو مازال لفوق فالدانمارك كاين النجم عصام بشيري ديال

Pumbaالنرويج ساكن فيها 7500 مغربي فقط منهم الرابور

وصلنا دابا لبلادنا المحبوبة السويد و نبداو بمونة روكاشي الي ربحات ستوديو دوزام عندها أغنية وحدة بالسويدية

اللي ربحات أوروفيزين عام 2012 سويدية من أصل مغربي سميتها لورين أصلها من تمازيغت الأطلس المتوسط

Leila K مغربية كانت معروفة بزاف فالسويد فالثمانينات التسعينات دابا تلاًت بها الأيام و ولات متشردة 😦

أنقطعو لبحر دابا و نمشيو لميريكان, ضروري نهضر على سعيدة فكري و من لا يعرفها

 French Montanaواحد الكَينكَسطا مغربي مزداد فالرباط و معروف فأمريكا سميتو

رابور بالدارجة ساكن فأمريكا سمييتو الفارس, حتى هو من الرباط

Vaï آخر بلاد آنسالي بيها الجولة ديالي هي كندا مع المغني اللي تولد ففرنسا و هاجر لكندا و هو صغير

السلطان يوسف واش دار شي حاجة مزيانة؟

  كنت كًالس واحد المرة كانعمل الركمجة فانترنت و كانقرا الخبار حتا طحت على هاد المقال حاشاكوم المكتوب من طرف واحد “المؤرخ معروف” اسمو عبد الهادي التازي وكايقول فيه أن السلطان يوسف مظلوم و كايزيد افًيخرات فالملوك لي من بعدو.

علاش أنا بغيت نهضر على السلطان يوسف بالضبط؟ علاود بلعة د الحوايج: أولا هاد السلطان مامعروفشي تقريبا واخا فالحكم ديالو وقع العجب فالمغرب وكان مونيكة كايدير أي حاجة طلبات منو فرانسا, و ثانيا حيث تماما بسبب هادشي كامل خاص نعًرفو بشكون حكم المغرب وكيفاش خان و شنو دار, علاوداش حنايا فالمغرب خاص كل مرة كاتسناو تا كايموت الواحد و دوز عليه 50 عام عاد تعايلي كاتقول: آه وا بالصح كان شويا مضعضع , ثالثا علاود كنت كانقرا فواحد الثانوية اسمها مولاي يوسف, وبقوة ماكاتبقا تعاود داك الكلمة (كتيشي مع مولاي) كاتولي كادجيك فشكل تعرف “عند من” قريتي, و أخيرا حيث بغيت عبد الهادي التازي يعرف باللي را غي كايشلًظ و عالله يقرا هاد التدوينة قبل ما يعدًي (الله يطول عمر الجميع على ماحال)

السلطان يوسف بدا كايحكم المغرب نيشان من 1912 و هو أول سلطان حكم المغرب المستعمَر حيث خاه السلطان عبد الحفيظ ميعادو بصم على معاهدة الحماية و هو يخرج من الحكم حيث ثارو عليه المغاربة لي كانو بايعوه واحد البيعة اسمها البيعة المشروطة, أهم شرط فيها هو المغرب مايتستعمرشي, جا هو خوا بيهم..

 على ما حال, أول حاجة أنعرفو إذن على هاد المولى يوسف هي باللي راه جا ف 1912, هادشي شنو معناه؟ دابا حنا عارفين باللي ف 1912 غيي شوية من المغرب لي كان محتل و عاد فرانسا توسعات شوية بشوية فداك الحركة لي سماتها “حروب التهدئة“. المهم الفكرة أنه أصلا لي ساهم فاستعمار المغرب هو لي جا من بعد 1912 حيث هو لي عطا الموافقة ديالو ل”حروب التهدئة” و قال للفرانساويين سيرو عالله اقتلو المهم هو “التهدئة”. و لي مزيان ملي كانشوفو هادشي را هو باللي هاد التهدئة تقاضات تال 1934, بيدمان السلطان يوسف مات ف 1927, يعني الخليفة ديالو “محرر الأمة” محمد بن يوسف كان عاطي 7 سنين الموافقة ديالو لحروب التهذئة, بمعنى آخر, شارك فالإستعمار و فالتحرير…

باش نرجعو للسلطان يوسف أول حاجة عمل من بعد التهدئة لي هضرنا عليها هي ملي بدات الحرب العالمية الأولى. كان العهد ديالو أول نوبة كاتعطى فتوى للمغاربة (لي هوما مسلمين) باش يشاركو فالحرب مع فرانسا “الحليفة” ديال المغرب. هنا كايبانلنا علاش مهم واحد بحال يوسف لفرانسا, حيث كايستاغل الدين و الوضع ديالو باش بقول للناس (لي الأغلبية ديالهم دراوش ماعارفين والو) باش إشاركو فحرب ماعندهم تاعلاقة معاها, وهو أيربح نقط حسنة مع فرانسا لي حامياه.

ولكن ولكن كاتبقا أكفس حاجة دارها هاد السلطان فحياتو هي باللي راه تحالف مع فرانسا و اسبانيا ضد الحركة التحررية د الخطابي. السلطان يوسف عاون فرانسا بالعسكر و عطا الموافقة ديالو على المناورات كاملة لي كانو النصارى كايعملوها باش يقضيو فمرة على جمهورية الريف. المشكلة الكبيرة را هي باللي الخطابي كان قال باللي را هو وراء السلطان (واخا مكفًس لا سقصيتيوني أنا) , و بالتالي هاد الخيانة الصراحة كاتبقا صعيب تفهم, إلا لا خديناها من الزاوية د را يوسف عارف لا الفرانسيس مشاو تاهو أيمشي كيما مشاو خوتو بجوج لس خانو قبل منو. هاد المقال كامل كتبتو الصراحة من بعد ما قريت هاد الفقرة لي صوًرت من عند التازي :

tazi

هو معلوم كلها يقول لي بغا و تقدر تقول حرية التعبير وهذا, ولايني لي خطير هو باللي عبد الهادي التازي را ماشي هو “أي واحد” , و إنما مؤرخ معروف و كايشارك فالندوات و الناس كاتًيق بداكشي لي كايقول بحال لا حقيقة و هو الصًح. 

بغيت نرجع للنقطة د الجامع د باريس حيث مهمة. الزيارة لي دار السلطان يوسف لباريس و دشن فيها داك الجامع را هي الزيارة النًيت لي احتافل فيها مع الفرانسيس و الجنرال الصبليوني بريمو دي ريفيرا بالانتصار ديال التحالف ديالهم على محمد بن عبد الكريم الخطًابي, و الحمد لله كانت المصورة تختارعات ديك لوقيتة و عطاتنا هادشي:

vainqueurs de Khattabi Lyautey et le SULTAN MOULAY YOUSSEF et Mohammed el Mokri et Kaddour Ben Ghabrit dans une reception autour d'une table d'hospitalite marocaine le sultan Moulay Youssef et le général Lyautey le 23. 9 . 19 Petain Primo Youssef

هادي كانت غي مقدمة خفيفة باش الواحد يعرف التاريخ د بلادو , و لي بغا يتعمق اكثر فالعلاقة مابين السلطان يوسف و الخطابي يقدر مثلا يقرا هاد المقال المطوًل. و عافاكوم لي كايعرف التازي يقولو ينقص شويا را كايجبدنا و هو كايصحابلو تاحد ماعارف تاحاجة.

على ماحال باش مانخرجوشي على الموضوع الجواب د عنوان التدوينة هو موحااال, و الله أعلم.

أزول

Sur l’instrumentalisation de l’histoire au Maroc [Archive de 2011]

Tags

, , , , , , , , , ,

L’histoire du Maroc est manipulée dans ses moindres détails pour justifier la légitimité du pouvoir en place (classé 119eme au passage, régime autoritaire selon http://en.wikipedia.org/wiki/Democracy_Index). Nous élèves du système marocain avons appris au collège les glorieuses vies de Mohammed 5 et de Hassan 2 (avec des notes et des examens dessus), on nous a fait croire que le Maroc a 1200 ans d’existence, et que avant Idriss 1er, il n’y avait que des tribus sauvages. Même l’islam au Maroc, ce n’est pas Idriss 1er qui fût le premier à le ramener dans notre pays, mais o9ba ibno nafi3 100 ans avant, mais lui n’étant pas d’intérêt pour le pouvoir actuel, on ne juge pas necessaire de savoir de qui il s’agit. De plus, les idrissides n’ont jamais regné sur tout le maroc (actuel) puisqu’il y avait les deux autres royaumes de berghwata (region de tamesna entre Salé et Safi), et le royaume de Nekor (RIF).

Image

Même pendant les temps modernes, les alaouites n’ont jamais vraiment régné sur tout le Maroc, et le blad siba se révoltait constamment, l’exemple le plus connu étant celui de Bouhmara (traité de tous les noms dans les livres d’histoire) ou encore la révolte des tribus amazighes sur Fes en 1912 qui a contraint le sultan Hafid a solliciter l’aide de la France (bizzare?!).Encore plus récent, Hassan II et son opération écouvillon pour tuer l’armée de résistance, ou ses exploits au Rif en compagnie d’oufkir sont méconnus d’un grand nombre de nos compatriotes.

Image

L’histoire est donc bien évidemment biaisée et réecrite par ceux qui ont le pouvoir en cours et essayent de faire “gober” leur version à travers tout les moyens dont ils disposent, que ce soit les medias, les pseudo-intellectuels, les manuels scolaires..Mais malgré toute ma critique, le système marocain a le mérite de donner à l’élève un minimum de bagage (bien choisi certes), ce qui n’est pas le cas du marocain qui est allé dans le système francais, et qui doit soit être vraiment intéressé et chercher tout seul, soit être poussé par ses parents pour découvrir l’histoire de son pays..Au niveau culturel, notre pays est inimaginablement riche que ce soit au niveau oral ou écrit.

Image

Si les marocains ne sont pas unis par le roi,la religion,la langue ou le football, ils le sont toutefois par les traditions ancestrales ,les contes, la musique. La mort de Mohammed Rouicha en est un exemple concret,ou des marocains de tous les horizons ont salué cet artiste et avoué avoir aimé sa musique (l’article annonceant sa mort à atteint un nombre record de commentaires sur hespress). Les contes sont aussi les mêmes dans plusieurs régions, avec quelques petites différences bien entendu. Les poésies, la 7al9a, les contes des f9ih dans des villages un peu partout, tout ce folklore alliant amazighs et arabisés, juifs et musulmans,andalous sahraoui méditeranéens (oui bon vous avez lu la nouvelle constitution :D) fait de notre pays un vrai puits largement non exploité et qui cache plusieurs surprises qu’il vaut mieux découvrir et apprendre à aimer que de se concentrer sur les differences…P.S: On pourrait aussi largement parler du problème d’analphabètisme, mais ceci ne touche pas vraiment la question, j’ai donc essayé de me concentrer sur la maroc “utile” (celui du tgv et du tramway,selon les critères de Lyautey ,pas celui de Tinghir et Anfgou )

[20 Feb Archives] Discussion avec Driss Ksikes et la peur au Maroc

Tags

, , , , , ,

في  إطار النقاشات على الفيسبوك في عدد من المجموعات بعد مرحلة ال20 فبراير قررت إحدى المجموعات التي كنت عضوا فيها دعوة الصحفي المعروف إدريس كسيكس  و كانت لي معه المناقشة التالية حول سوسيولوجية و أسباب الخوف عند المواطن المغربي, التي قررت كذلك نشرهاعلى مدونتي تعميما للفائدة

Image

 

Driss Ksikes

Le paradigme de peur (de trop chambouler la donne, de trop bousculer les privilèges, de trop céder aux pressions …) semble être toujours déterminant dans la gouvernance politique du Maroc. Pensez-vous que la peur puisse être un facteur stimulant et dynamisant dans une société en mal d’initiatives, d’innovation et de prises de risque ?

Anass

Malheureusement la peur est bien lotie chez le peuple marocain et ce pour diverses raisons, celles qui me viennent à l’esprit en ce moment sont:

  1.  La première et la plus évidente d’entre elles est l’héritage du règne sanglant de Hassan 2. Des évenements du Rif en 1958, a ceux de 1990 en passant par 65,81,84, tazemmamart, 9al3at megouna et plusieurs autres glorieuses actions comme dirait moulay mostafa ont calmé à jamais une majorité qui préfère vivre sa vie sans se faire remarquer,et qui tient donc à se taire et à éduquer ses enfants de la sorte pour ne pas s’attirer de problèmes.
  2. Certains pseudo-penseurs jouent sur le peur de la déstabilisation du pays. Ah si on perd le roi le pays entrera en guerre, les amazighs, les sahraouis, les arabisés entreront en guerre civile.. Si ce n’est que ces personnes qui pensent cela, ca serait bien. Mais le problème est que plusieurs sont attirés par cette thèse croyant nottament utiliser leur logique pour s’en convaincre, et ceci est une autre raison pour les faire stopper. Exemple, X est convaincu que le système est pourri et doit changer, mais ah problème, j’ai peur de m’engager dans une révolution car après mon cher roi va être en danger, non je reste chez moi et je fais une grasse matinée le dimanche matin.
  3. Les politiciens sont biensûr les plus affectés par cette peur, non parce qu’ils ont peur d’aller en prison (7acha, les ministres de sa majesté ne font pas d’erreurs ) ni à cause de leur opinion (qui doit être conforme au normes du makhzen, sinon il ne serait pas choisi depuis des lustres). Les politiciens ont peur car ils savent que s’ils veulent bien faire ou veulent innover, ils seront confrontés à des plus hauts placés qui les en empecheront pour garder leur prévilèges (et dieu sait combien il y en a). Donc, de peur de perdre leur place, on laisse faire. Là me vient à l’esprit l’histoire du douanier à l’aéroport de casablanca qui a osé arrêter le fils de abdoulay wade qui était en pocession de drogue. Bien évidement, il a été corrigé pour cette faute profesionnelle et profite de belles journées ensolleillées au Sahara en mangeant un plat sur deux, car la moitié des ressources destinées aux officiers au sahara s’arrêtre devant les villas des généraux..

Image

Driss Ksikes

C’est indiscutablement entre les deux que se situe le problème. Quand une légitimité est construite par la violence symbolique, la sacralité, les relais de la rente organisée, l’organisation de la propagande, la justification de l’autocensure et la fabrication du consentement, avec l’adhésion des acteurs, sociaux, politiques et médiatiques, il se peut qu’il y ait confusion entre le respect de l’autorité légitime et la peur de perdre les acquis octoyés (non mérités) par cette même autorité.