• About

Mocroland

~ My other Morocco

Mocroland

Tag Archives: الريف

نش د الحراك – ⵏⴻⵛ ⴷ ⵍⵃⵉⵔⴰⴽ

22 Thursday Jun 2017

Posted by ameghribi in Moroccan Politics & News

≈ Leave a comment

Tags

hirak, hoceima, maroc, morocco, protests, rif, zefzafi, المغرب, الحراك, الحسيمة, الريف, الشعبي

تنبيه و توضيح و اعتذار: بغيت نشير قبل هاد ماتقراو هاد التدوينة بللي انا ماعندي تا شرعية باش نهضر باسم الحراك، انا ماشي من اللجنة المنظمة و لا من لجنة التواصل و الاعلام. أنا فقط مواطن مهتم بالحراك و متفق مع مطالبه و افكاره المشروعة. بغيت نعتاذر بالخصوص لناصر الزفزافي و نبيل احمجيق حيث نشرت عليهم خبر بلا مانكون حاضر و بلا ما نتأكد من الصحة ديالو. كانتمنا الاطلاق د السراح ديالهم فاسرع وقت هوما و كاع معتقلي الحراك المظلومين ان شاء الله.

أزول خاوام, السلام عليكم,

هاد التدوينة فالحقيقة كان خاصني نكتبها شحال هادي. و لكن بزاف د الظروف خلاتني نتعطل و نخرًجها تال دابا. كانتمنا واخا هاكاك تكون باقا فالسياق و لي قراها يستافد منها, إما بمعلومات جداد و لا بشي نقاش لي نقدرو نبداو و نتمناو يكون بنًاء.

هاد التدوينة لي سميتها نش د الحراك (أنا و الحراك) ماغاديش نهضر فيها بزاف على الأحداث و لا على الأخبار. أولا حيث داكشي معروف بزاف و ثانيا حيث بغيت نعطي بعد شخصي, ماشي ندير تحليل سياسي. هو فالحقيقة كاين بزاف مايتقال من الناحية التحليلية, بحال مناقضة مفهوم دولة و انفصال و مؤسسات و دكاكين و أحزاب, و لكن راني بزًزت على راسي مانجبدهاش فهاد التدوينة, باش يكون فيها غي البعد لي بغيت. ديك المفاهيم كامة و نقاشات خرا أنحاول نرجع ليها فتدوينات اخرى إن شاء الله.

بالنسبة للي مامتعبش (و تانشك أي واحد تيقرا هادشي را أيكون متبًع), الحراك الشعبي فالريف هو واحد السلسلة د المظاهرات, وقفات و مسيرات لي بداو فاللخر د أكتوبر 2016 من بعد ما تقتل واحد الشاب سميتو محسن فكري فالحسيمة. هاد الشاب تطحن ف كاميو د الزبل حيث شي واح عطا أمر يطحنو من بعد ما دخل للكاميو يحتج على أنه رماوليه الحوت كامل لي كان ايبيع فالزبل. المهم هنايا بدا الحراك ديك النهار نيت و كانت وقفة, فيها ناصر الزفزافي و عامل إقليم الحسيمة و وكيل الملك, و بقاو تيهضرو الليل كامل بحال لي عارفين فهاد الفيديو:

 

 

 

 

 

نهار من بعد, كانت وقفة فالحسيمة, و هاديك هي أول مرة سمعت فيها بالزفزافي:

 

 

 

 

المتدخل الان الزفزافي يقول يجب التوقف عن الكلام في الهواء، إنما يجب التحرك، و يقترح تأسيس لجنة من الحاضرين فالوقفة لمتابعة الملف #الحسيمة

— ⴰⵏⴰⵙⵯ (@zi_agharabo) October 29, 2016

فهاديك الوقفة, تأسسات اللجنة د الناس لي حضرو, و كانت سميتها اللجنة لمتابعة التحقيق في ملف الشهيد محسن فكري. هاديك كانت أول نواة ديال الحراك. اللجنة فاللول كانت تاتجمع فالحسيمة و تادير لايفات فيسبوك. بزاف د اصحابي كانو فاللجنة,  و بزاف منهم معتقل دابا مع الحراك. أول مطالب د اللجنة كانت هي هادي:

وقفة في الحسيمة مباشرة، المطالَب:
– اعتذار رسمي من الدولة
– تعويض عائلة الضحية
– تحقيق نزيه بمشاركة المجتمع المدني
– وقف تهميش الصيادين

— ⴰⵏⴰⵙⵯ (@zi_agharabo) October 29, 2016

ديك الساعة, كانت قضية محسن فكري هي المهمة فوسائل التواصل الإجتماعي و هضر عليها المغرب كلو. بالموازاة مع داكشي, كانت اللجنة تادير اجتماع مورا اجتماع و تطورات. من تما ولات منظمة اكثر و تطوًرات و حتى المطالب ديالها تقادًات اكثر و ولات شاملة. اللائحة د المطالب النهائية تقررات نهار 5 مارس 2017 و تعرضات على الجماهير الشعبية فوقفة فالحسيمة و اتافقو عليها. لي بغا يشوف لائحة المطالب د الحراك كاملة را كاينة فويكيبديا, فهاد الرابط. ما حدًي تانهضر على المطالب, واحد القضية مهم لاحظتها هاد الأيام. ملي الدكاكين السياسية (الأحزاب) تيهضرو دابا على المطالب, بحال إلا تيقولو غي الإقتصادية و الإجتماعية, را كاين تا مطالب قانونية و حاضرة من النهار الأول, بحال الكشف عن مصير 5 د الشبان لي تقتلو ف 2011, و شفت بحال لا الأحزاب و لا المؤسسات الرسمية تيحاولو يديرولها عامرة فخاوية باش تًنسى.

 

 

 

لي وقع من أواسط نونبر تال أبريل هو بلًي اللجنة و الحراك تطورو و ولاًو تيديرو مظاهرات كبار مرة فالأسبوع وحتى أكثر. كانو بزاف د الأشكال د المظاهرات بحال المظاهرة ديال قرع الطناجر و مظاهرة الأكفان. المهم ماشي هادشي لي بغيت نقول. لي بغيت نقول هو فهاد الوقيتة كلها بداو الناس فالمناطق الخرا د المغرب تينساو الحراك و ماتبعوهش بزاف. غادي يعاودو يتبعوه تا أيولي الزفزافي مشهور  مع اللايفات فيسبوك لي كان تيدير. فهاداك الوقت لي ماكانوش الناس متبعين, هو لي وقعو بزاف د الحوايج. أنا كنت متبع. فديك الوقيتة كانت تاتروج اشاعات على مشكل فالقيادة د الحراك حيث بزاف (حسب الاشاعة لي ماتحققتش منها) كان تيجيهم بلي الزفزافي ماتيناقش ديما و شي مرات تيدير قرارات فردية. فواحد الوقت وصلات الاشاعة لأنه تا دينامو الحراك نبيل أحمجيق تناقش مع ناصر و ماتفاهموش فهاد القضية.هادشي انا ماعارفوشي واش بالصح و لا لا . هداك هو الوقت فاش أيضا المرتضى إعمراشا غايبدا ينتاقد الزفزافي بشكل غريب و هجومي. مبعد المرتضى غادي يتطرف فاللإنتقادات و يولي تيدخل فالحياة الشخصية. ماعلينا, المهم ديك الساعة كانت الوقت هانية و الإختلاف رحمة. تانا طبعا كانت عندي وجهة نظر على الامور واخا غير كملاحظ، و معلوم كنت و باقي تانساند الحراك.

 

 

الزفزافي مزيان و مناضل على الرأس و العين متافقين، و لكن باش نوصلو لمرحلة التقديس و عدم الانتقاد و النقاش و الحليب و التمر تما حاجة خرا عاود

— ⴰⵏⴰⵙⵯ (@zi_agharabo) May 2, 2017

ديك الساعة كيما قلت كانت الأمور هانية و ماكان احد محبوس. هادوك الإنتقاد كنت كتبتو فإطار واحد السلسلة د التغريدات لي كتبت على الحراك مع كنت عاد جيت من المغرب و راسي تيدندن غي لا للعسكرة. و كيما قلت, ديك الساعة أغلب الناس (فالمناطق الأخرى) ماكانش عندها غرض بالحراك و كاين لي ماعارف عليه والو (و أيجي يفهم علينا مبعد). السلسلة د التغريدات كانت هي هادي:

جيت حيث الصباح كلو وانا تاندندن "لا العسكرة لا العسكرة هي" و بعد امضاء مدة ليست بالهينة فالحراك كانظن انه راكمت شرعية صغيرة باش نهضر عليه

— ⴰⵏⴰⵙⵯ (@zi_agharabo) May 2, 2017

فديك الوقت, كنت عايشت و تبعت الحراك الشعبي ل6 أشهر. الشهر السابع كان أيكون هو الغريب علاش؟ حيث فهاداك الشهر بحال لي قلت, غادي يتشهر الزفزافي بزاف باللايفات, و غايبداو يبانو الفهايمية و العياشة و محللي آخر ساعة. هاد الشهرة لي دارت مبعد بالحراك فنظري هي لي خلات الناس تمشي للحبس. أول واحد تانلومو هو وسائل الإعلام, لي فنظري كانو تيحاولو يلقاو السكوبًات بزًز, و بزاف د المرات خلقو مشاكل لعدد د الناس. مثلا واحد المرأة سميتها نوال بنعيسى كلشي بدا تيوصفها باللي راها قائدة الحراك مورا الزفزافي. و داكشي تيقولوه من إديولوجيا نسوية (خاصة الجرائد الفرانكوفونية). و هي براسها تبرأت من داكشي, و خلقواها غي المشاكل مع البوليس لي استدعاوها فإطار أنها القائدة الجديدة.

 

عافاكوم ا وسائل الاعلام (لا بالعربية لا الفرانكوفونية) ماتبقاوش تنفخو ناس بعبارات بحال "خليفة الزفزافي" ولا القائد الجديد، منين جبتيو هادشي؟

— ⴰⵏⴰⵙⵯ (@zi_agharabo) June 1, 2017

بحال لي قلت, ما بغيتش نهضر بزاف على الحراك من الناحية د المستجدات و الأخبار و التحليلات و الأراء, حيث هاديك كاينة بزاف, و كاين ناس أحسن مني لي يقدرو يحلًلو و يشخصو مع أخد التاريخ و معطيات أخرى بعين الإعتبار.أنا بغيت غي نعطي نبذة شخصية على كيفاش عشت مع الحراك لي وصل دابا لتقريبا 8 أشهر. يمكنلك تتخيل شي واحد عايش هادشي هاد المدة كاملة. و يفيق نهار يلقى اصحابو و ناس لي شارك معاهم بزاف د الحوايج تعتاقلو ما بين ليلة و ضحاها, و كاين لي تخطف و لي تعذب. أشنو غادي تقول ملي تشوف شارع ماتيخليوكش تدخلًو إلا بالبطاقة الوطنية؟ و لا ملي تشوف هاد البراعم فالحبس بشي تهم لي يمكن أصلا ما تيفهموهاش؟

توصلت بصورة شاب عمره 17 سنة اسمه احمد بنهادي
هاد الشاب معتقل الحراك من طرف الدولة
يقدر يكون خوك او ولدك
اللهم هذا منكر pic.twitter.com/3FtSlc9mIL

— ⴰⵏⴰⵙⵯ (@zi_agharabo) June 22, 2017

كنت قلت واحد الوقت بلي يمكن كان عندي ملاحظات على الحراك. هادشي ماتيعنيش باللي راه ماتاتافقش مع مطالب, و إنما غي   ملاحظات فالتدبير, لي تقدر تكون ملاحظة فالحياة اليومية ما بين أفراد الأسرة الواحدة, و ماتاتعنيش باللي باقين مامتافقينش تال دابا. بحال لي قلت, أنك تنتاقد فوقت فيه الأمور هانية بغرض التقويم ماشي هو تنتاقد واحد و هو فوضع ضعف و باغي تتشفى فيه. بالعكس دابا فنظري آخر حاجة خاص نشوفو هي الإختلافات. خاص نكونو مجموعين ضد الفساد والإستبداد. الحاجة الوحيدة لي مهمة دابا عندي هي كًاع هاد الناس يخرجو من الحبس حيث مظلومين و ماعندهم تا علاقة مع التهم لي ملصقينها ليهم. آش جاب  المرتضى إعمراشا للإرهاب؟ واش 2700 درهم تمويل خارجي تيهدد استقرار شي دولة؟

اللهم إن هذا منكر واها

وأخيرا و ليس آخرا, راه خاص إطلاق سراح المعتقلين, هادي راه ضرورية و خاص تكون اليوما قبل غذا. آخر لائحة د المعتقلين عندي كانت نهار21 يونيو 2017.

DCzgIEEV0AA3Iv1

المشكل كل نهار تيزيدو يعتاقلوما بين 5 تال 6 د الناس. مورا هادشي عاد خاص تتحقق كًاع المطالب لاخرا.

هذا ماكان, و أثقداوم إ مارا

 

Recent Posts

  • نش د الحراك – ⵏⴻⵛ ⴷ ⵍⵃⵉⵔⴰⴽ
  • أشناهي الراية و أشناهو مفهوم الدولة
  • التطور ديال جريدة هسبريس ف 7 سنين من 2007 ل 2014
  • اللسانيات د الدارجة بالدارجة (الحلقة اللولا) – شي شوية د الكلمات لي عنا فالدارجة لي أصلهم أمازيغي
  • أبحاث خاطفة حول جمهورية سلا و بدايات الإسلام في أمريكا

Archives

  • June 2017 (1)
  • November 2016 (1)
  • July 2015 (1)
  • April 2015 (1)
  • January 2015 (1)
  • September 2014 (1)
  • August 2014 (1)
  • February 2014 (3)
  • December 2013 (1)
  • November 2013 (1)
  • September 2013 (1)
  • March 2013 (1)
  • January 2013 (1)
  • December 2012 (2)
  • November 2012 (3)
  • October 2012 (2)
  • April 2012 (1)

Categories

  • Linguistics
  • Moroccan Culture
  • Moroccan History
  • Moroccan Politics & News
  • Social Media manipulation
  • Talking In The Air
  • Unknown Music

مدونات تقدر تعجبكم

  • A L'OMBRE DE TAHA HUSSEIN
  • Abmoul – Son Of Words
  • Carnet De Beur
  • CJDM – Takhouar
  • Des maux à dire
  • Eplume
  • Histoire du Maghreb
  • Ibn Kafka
  • Jewish Morocco
  • khayatttt
  • L'École Frontale de Rabat
  • larbi.org
  • Le Boudoir
  • Le Politiconaute Marocain
  • MadridRabat
  • Mamfakinch
  • Maroc Libre مغرب حرّ
  • Med Mouad
  • ONE WORD: REVOLUTION
  • Shrine Of Dreams
  • Sihem Abbas
  • Souleiman Bencheikh
  • SWEETOLOGY
  • The Moorish Wanderer
  • كتيب كتبان إفريقيا
  • لاليور دو لاطلاس
  • مدونة فؤاد
  • مدونة لطيفة
  • مدونة مواطن مع وقف التنفيذ
  • مدونة محمد
  • مدونة أحمد ولد جدو
  • مسودّة الباديخو
  • مغربية
  • نسيم الفجر
  • Zaafarane
  • الناقد السياسي
  • الشرقية في الغرب
  • بلا فرنسية
  • بُشْرَى لَنَا
  • باراكا
  • شذرات مراكشية

Meta

  • Register
  • Log in
  • Entries feed
  • Comments feed
  • WordPress.com

شحال د الناس كادقرا

  • 12,043 واحد

Blog at WordPress.com.

Cancel
Privacy & Cookies: This site uses cookies. By continuing to use this website, you agree to their use.
To find out more, including how to control cookies, see here: Cookie Policy